Noordelike Waterslang

Ondanks sy grootte, bevat die Noordelike Waterslang net een redelik helder ster, alpha Hydrae of Alphard ("die enkelster") met ’n helderheid van 1,98 mag. Dit is eintlik ’n dubbelster. Die ander hoofster met ’n naam in die sterrebeeld is Sigma Hydrae, wat ook Minaruja genoem word (Arabies vir "slang se neus"). Teen ’n helderheid van 4,54 mag is dit taamlik dof.

R Hydrae is ’n veranderlike ster met ’n helderheid wat wissel tussen 3,5 mag, wanneer dit met die blote oog gesien kan word, en 10,9 mag, wanneer ’n teleskoop nodig is.

Daar is verskeie dubbelsterre, asook die radiobron Hydra A.

Die Noordelike Waterslang bevat drie Messier-voorwerpe. Messier 83, ook bekend as die Suidelike Windmeul-sterrestelsel, is geleë op die grens van die Noordelike Waterslang en die Sentour; Messier 68 is ’n bolvormige sterreswerm naby M83; en Messier 48 is ’n oop sterreswerm aan die westekant van die sterrebeeld.

NGC 3314a en NGC 3314b is twee sterrestelsels wat lyk of hulle bo-op mekaar lê, hoewel hulle nie verwant of op enige manier interaktief is nie. Eersgenoemde lê die naaste aan die Aarde, 140 miljoen ligjare weg. Laasgenoemde se kern lyk rooi vanweë NGC 3314a se stofplaat.^[1]

Die Noordelike Waterslang word geïdentifiseer met ’n verhaal in die Griekse mitologie waarin ’n kraai Apollo bedien en gestuur word om water te gaan haal. Op pad rus die kraai lank en nadat hy eindelik die water in ’n beker opgeskep het, neem hy ’n waterslang terug as verskoning omdat hy so lank gevat het. Apollo besef egter wat gebeur het. Hy is woedend en werp die kraai, beker en slang in die lug in. So het die sterrebeelde Kraai, Beker en Noordelike Waterslang ontstaan.

• Ridpath, Ian, en Tirion, Wil (2007). Stars and Planets Guide, Collins, Londen. ISBN 978-0-00-725120-9. Princeton University Press, Princeton. ISBN 978-0-691-13556-4.

• The Deep Photographic Guide to the Constellations: Hydra
• Star Tales – Hydra

• Wikimedia Commons het meer media in die kategorie Noordelike Waterslang.
• Hierdie artikel is vertaal uit die Engelse Wiki How