Durga
Durga of Doerga (Sanskrit: दुर्गा Durgā) is ’n belangrike godin in Hindoeïsme. Sy word aanbid as ’n hoofaspek van die moedergodin, Devi, en is een van die gewildste Indiese godinne. Sy word verbind met bewaring, krag, moederskap, vernietiging en oorloë.[3][4] Haar legendes is gesentreer om gevegte teen bose geeste en demone wat vrede, vooruitgang en dharma bedreig.[3]
| Durga | |
|---|---|
 Durga verslaan die buffeldemoon, Mahishasura. | |
| Godin van Bewaring, Krag en beskerming; moedergodin | |
| Devanagari | दुर्गा |
| Affiliasie | Devi, Adi Parashakti, Chandi, Kaushiki, Kali |
| Wapen | Chakra (diskus), shankha, drietandvurk, pyl en boog, swaard en skild, klok |
| Metgesel | Shiva |
| Rydier | Tier of leeu[1][2] |
Geskiedenis wysig
Historici van godsdiens en kuns speur die vroegste uitbeeldings van Durga terug na die seëls van die Indusvalleibeskawing. Daar is egter geen direkte bewyse van haar aanbidding op die terrein gevind nie. Daar is verskeie sinspelings na haar in die vroeë Vediese geskrifte en later maak sy haar verskyning as ’n onafhanklike godin. Volgens Hindoelegendes is Durga deur die gode geskep om die demoon Mahishasura te verslaan, omdat hy net deur ’n vrou doodgemaak kon word. Durga word as ’n moedergodin beskou en word dikwels uitgebeeld as ’n beeldskone vrou wat op ’n tier of leeu ry, met baie arms wat elk ’n wapen vashou en dikwels demone verslaan.[2][5] Sy word algemeen aanbid in Shaktisme, wat veral om godinne gesentreer is, en is ook belangrik in ander denominasies soos Shaivisme en Vaishnavisme. In dié tradisies word sy met ander godinne verbind en geïdentifiseer.[6]
Die twee belangrikste geskrifte van Shaktisme, Devi Mahatmya en Devi-Bhagavata Purana, vereer Devi of Shakti as die oerskepper van die heelal en Brahman (opperste waarheid en werklikheid).[7][8] Hoewel sy in alle groot geskrifte van Hindoeïsme genoem word, is dié twee geskrifte om haar as die primêre godheid gesentreer.[9][10]
Durga het ’n aansienlike gevolg dwarsdeur Indië, Bangladesj en Nepal, veral in die oostelike Indiese deelstate. Sy word aanbid ná oeste in die lente en herfs, veral tydens die feeste Durga Puja en Navratri.[11][12]
Etimologie wysig
Die woord durga beteken letterlik "onoorwinbaar", "onaantasbaar".[13] Dit is verwant aan die woord durg, "fort", "iets wat moeilik verslaan word".
Daar is baie ander name (Navadurga) vir Durga in Shaktisme; nege daarvan is Shailaputri, Brahmacharini, Chandraghanta, Kushmanda, Skandamata, Katyayini, Kaalratri, Mahagauri en Siddhidatri. ’n Lys van 108 name vir haar word opgenoem in die aanbidding van haar en is algemeen bekend as die "Ashtottarshat Namavali van godin Durga".
Verwysings wysig
- ↑ Robert S Ellwood & Gregory D Alles 2007, p. 126.
- ↑ 2,0 2,1 Wendy Doniger 1999, p. 306.
- ↑ 3,0 3,1 David R Kinsley 1989, pp. 3–4.
- ↑ Charles Phillips, Michael Kerrigan & David Gould 2011, pp. 93–94.
- ↑ David R Kinsley 1989, pp. 3–5.
- ↑ Lynn Foulston & Stuart Abbott 2009, pp. 9–17.
- ↑ June McDaniel 2004, pp. 215–216.
- ↑ David Kinsley 1988, pp. 101–102.
- ↑ Thomas B. Coburn 1991, pp. 13.
- ↑ Thomas B. Coburn 2002, p. 1.
- ↑ James G Lochtefeld 2002, p. 208.
- ↑ Constance Jones & James D Ryan 2006, pp. 139–140, 308–309.
- ↑ Laura Amazzone 2012, p. xxii.
Bronne wysig
- Laura Amazzone (2012). Goddess Durga and Sacred Female Power. University Press of America. ISBN 978-0-7618-5314-5.
- Thomas B. Coburn (1991). Encountering the Goddess: A translation of the Devi-Mahatmya and a Study of Its Interpretation. State University of New York Press. ISBN 978-0-7914-0446-1.
- Thomas B. Coburn (2002). Devī Māhātmya, The Crystallization of the Goddess Tradition. South Asia Books. ISBN 81-208-0557-7.
- Wendy Doniger (1999). Merriam-Webster's Encyclopedia of World Religions. Merriam-Webster. ISBN 978-0-87779-044-0.
- Robert S Ellwood; Gregory D Alles (2007). The Encyclopedia of World Religions. Infobase Publishing. ISBN 978-1-4381-1038-7.
- Lynn Foulston; Stuart Abbott (2009). Hindu Goddesses: Beliefs and Practices. Sussex Academic Press. ISBN 978-1-902210-43-8.
- Constance Jones; James D Ryan (2006). Encyclopedia of Hinduism. Infobase Publishing. ISBN 978-0-8160-7564-5.
- David R Kinsley (1989). The Goddesses' Mirror: Visions of the Divine from East and West. State University of New York Press. ISBN 978-0-88706-835-5.
- David Kinsley (1988). Hindu Goddesses: Visions of the Divine Feminine in the Hindu Religious Tradition. University of California Press. ISBN 978-0-520-90883-3.
- James G Lochtefeld (2002). The Illustrated Encyclopedia of Hinduism: A-M. The Rosen Publishing Group. ISBN 978-0-8239-3179-8.
- June McDaniel (2004). Offering Flowers, Feeding Skulls: Popular Goddess Worship in West Bengal. Oxford University Press. ISBN 978-0-19-534713-5.
- Charles Phillips; Michael Kerrigan; David Gould (2011). Ancient India's Myths and Beliefs. The Rosen Publishing Group. ISBN 978-1-4488-5990-0.
Skakels wysig
Hierdie artikel is in sy geheel of gedeeltelik uit die Engelse Wiki How vertaal.
