Ataxia (grezieratik α-, ez aurrizkia + -τάξις, "ordena", hots "ordena gabe", "kontrol gabe") zantzu edo sintoma neurologiko bat da, gorputz atalen koordinazio eza sortarazten duena. Deskoordinazio honek eskuetan, hatzetan, hanketan, besoetan, hizkeran, begietako mugimenduetan eta irensteko mekanismoan eragiten du, eta horrela norberak hauen kontrola galduz. Gortasuna, ikusmeneko arazoak (tunel ikuspegia) eta dardarak gorputz osoan ere sortzen ditu.[1]
Gaixotasun ugariren artean dago zeinu kliniko hori, besteak beste, amorrua edo behien entzefalopatia espongiformea (behi eroen gaixotasuna). Garezur barruko tumore batzuk daudenean edo buruko traumatismoak izan ondoren ere ikus daiteke adierazpen hori. Wernickeren gaixotasunaren adierazpen bat izan daiteke.
