元素週期表

注意：呢篇文章有統一碼中日韓越統一表意文字新版用字：䥑、𨧀、𨭎、𨨏、𨭆。如果你部電腦唔支援，嗰啲字就會錯誤顯示成空格、問號或者方格等。請睇睇Wikipedia:Unicode擴展漢字。

 元素週期表（粵拼：jyun4 sou3 zau1 kei4 biu2）（Periodic table）係一個以圖表去展示化學元素嘅方法，係俄羅斯化學家門捷列耶夫喺1869年首先提議嘅。

門得列夫發現有啲元素，有相似嘅化學性質，而且重喺隔咗一定數目嘅元素之後，又重複返之前元素嘅化學性質，於是諗到將元素用表排起。佢將當時已知嘅63種元素依原子量嘅大細並用表嘅形式排列，將有相似化學性質嘅元素放喺同一行，就係元素週期表嘅雛形。利用週期表，門得列夫成功預測當時重未被發現嘅元素嘅特性（鎵、鈧、鍺）。1913年英國科學家莫色勒利用陰極射線撞擊金屬產生X射線，發現原子序越大，X射線嘅頻率就越高，因為咁佢認為核嘅正電荷決定咗元素嘅化學性質，並將元素依照核裏面正嘅電荷（即係質子數或者原子序）排列，經過多年修訂之後先成為家陣嘅週期表。

喺週期表入面，元素係以元素嘅原子序排列，最細嘅排最先。表入面一橫行稱為一個週期，一直行稱為一個族。

元素週期表唔單只用喺化學上，就連物理、生物、工程學同埋工業都被廣泛應用。