Անիլ Կապուր

Անիլ Կապուրը ծնվել է կինոպրոդյուսեր Սուրինդեր Կապուրի ընտանիքում, ունի երկու եղբայր և մեկ քույր։ Նրա ավագ եղբայրը պրոդյուսեր Բոնի Կապուրն է՝ դերասանուհի Շրիդևիի ամուսինը, իսկ կրտսեր եղբայրը դերասան Սանջայ Կապուրն է։

Անիլ Կապուրի կինոդեբյուտը կայացել է 1979 թվականին։ Սկզբնական շրջանում նա հանդես էր գալիս երկրորդական դերերով։ Այդպիսի ֆիլմերից էր 1982 թվականին նկարահանված «Շակտի» կինոնկարը, որը ճանաչվել էր տարվա լավագույն ֆիլմ։ Առաջին անգամ Անիլ Կապուրը գլխավոր դերով հանդես է եկել «Այն յոթ օրը» (1983 թ.) կինոնկարում, որի պրոդյուսերը հայրն էր։ Հաջորդ՝ 1984 թվականին նա նկարահանվել է Յաշ Չոպրայի «Ջահ» կինոնկարում, որի համար արժանացել է Filmfare Award-ի՝ տղամարդու լավագույն երկրորդ պլանի դերի համար։ Հատկանշական են նրա դերակատարումները «Այրող կիրք» (1988 թ.), «Որդին» (1992 թ.), «Հողի կանչը» (1997 թ.), «Սիրո ռիթմերը» (1999 թ.) և այլ ֆիլմերում, իսկ «Կոչ» (2000 թ.) ֆիլմի համար նա արժանացել է Ազգային կինոպարգևի։ Կարևոր տեղ է գրավում նաև նրա աշխատանքը «Միսթր Հնդկաստան» (1987 թ.) ֆիլմում։ Անիլ Կապուրի խաղացանկից կարելի է առանձնացնել նրա դերակատարումները «Խիզախը» (1986 թ.), «Սիրո տառապանքներ» (1997 թ.), «Համար մեկ կինը» (1999 թ.), «Բարև, սեր» (2007 թ.), «Մրցավազք» (2008 թ.), «Ժառանգները» (2008 թ.) և այլ ֆիլմերում։

Վերջին շրջանում Անիլ Կապուրը նկարահանվել է նաև արտասահմանյան ռեժիսորների մոտ։ Այդ ֆիլմերից են «Միլիոնատերը ետնախորշերից» (2008 թ.) և «Առաքելությունն անիրագործելի է։ Ֆանտոմ արձանագրությունը» (2011 թ.) կինոնկարները։

1984 թվականին Անիլ Կապուրը ամուսնացել է մանեքենուհի Սունիտա Բհամբհանիի հետ։ Նրանք ունեն երեք երեխա։ Ավագ դուստրը դերասանուհի Սոնամ Կապուրն է, կրտսեր դուստրը՝ Ռեյա Կապուրը, պրոդյուսեր է, իսկ որդին՝ պատրաստվում է դերասան դառնալ։