მარაქეში (ბერბერ. Murakush; არაბ. مراكش), თაშნეშე ჩინებული მუჭოთ „ჭითა ნოღა" — არძაშე შანულამი, ჸოფილი საიმპერატორე ნოღა მაროკოშ ისტორიას. ასე მარაქეში მაროკოშ ცენტრალური ობჟათე-ბჟადალ ეკონომიკური რეგიონიშ მარაქეშ-ტენსიფტ-ალ-ჰაუზაშ ნანანოღა რე. იდვალუაფუ თირით ფორილ ატლასიშ გვალეფიშ გემინდორიას დო მაროკოშ მაანთხა უშხუაშ ნოღას წჷმარინუანს კასაბლანკაშ, ფესიშ დო ტანჟერიშ უკული.[1] მარაქეში ტანჟერიშ ობჟათე-ბჟადალშე 580 კმ-ით, რაბატიშ ობჟათე-ბჟადალშე 327 კმ-ით, კასაბლანკაშ ობჟათეშე 239 კმ-ით დო აგადირიშ ოორუე-ბჟაეიოლშე 246 კმ-ით რე მოჩილათირი.
ნოღა| შილა |  |
|
მარაქეში ართ-ართი რე მაროკოშ ოთხი საიმპერატორე ნოღაშე (მარაქეშიშ მოხ - ფესი, მექნესი, რაბატი).[2] ანდა შხვა ოორუეაფრიკული ნოღაშობურო, მარაქეშით აკმოდირთჷ ჯვეში, გომანგარაფილი ნოღაშე (მედინა) დო თის მეძინელი თეხანური ნოღაშე. 2018 წანაშ მუნაჩემეფით, ნოღას ოხორანს 952 000 ადამიერი.[3] ნოღას ოინალჷ მენარაშ ოერეფოშქაშე აეროპორტი, თეწკჷმა ართო, რკინაშარათ მერსხილი რე კასაბლანკაწკჷმა.
მარაქეშის უღჷ უკაბეტაში ტრადიციული ბაზარი (სუკი) მაროკოს, თაშნეშე ართ-ართი არძაშე დოკაფილი მოედანი ედომუშამ აფრიკას დო ედომუშამ მოსოფელს — ჯემაა-ელ-ფნა.[4] მოედანი გჷნოჭკადილი რე აკრობატეფით, მაკითხირეფით, წყარიშ ნოქარეფით, მასხაპალეფით დო მუსიკოსეფით. სერით თაქ ინწყუმუ ოჭკომალიშ ობიექტეფი დო მოედანი ღილე ცაშ გიმე მადვალუ უკაბეტაშ რესტორანო გჷნმირთუ.
