කල්කි කේක්ලන්

කල්කි කේක්ලන් (ⁱ/ˈkʌlki keɪˈklæ̃/; උපත 1982 ජනවාරි 10) යනුවෙන් හැඳින්වෙන්නේ ප්‍රංශ-ඉන්දියානු නිළියක සහ ලේඛිකාවකි. හින්දී චිත්‍රපට ක්ෂේත්‍රයේ ගතානුගතිකත්වයෙන් තොර වූ රංගන දායකත්වය හේතුවෙන් ප්‍රසිද්ධියට පත් ඇය, ජාතික චිත්‍රපට සම්මානයක්, ෆිල්ම්ෆෙයාර් සම්මානයක්, සහ ස්ක්‍රීන් සම්මාන ද්විත්වයක් ඇතුළු සම්මාන ගණනාවක් හිමිකරගෙන තිබේ. ප්‍රංශ පුරවැසියකු වුව ද, ඇය සිය ජීවිත කාලයෙන් වැඩි කලක් වාසය කොට තිබෙන්නේ ඉන්දියාවේ ය.

කල්කි කේක්ලන්
කේක්ලන් 2014 දී
උපත	10 ජනවාරි 1984 (1984-01-10) (වයස 40) පොණ්ඩිචෙරි, ඉන්දියාව
ජාතිකත්වය	ප්‍රංශ
උගත් ශාස්ත්‍රාලය	ලන්ඩන් විශ්වවිද්‍යාලය
රැකියාව	නිළිය ලේඛිකාව
සක්‍රීය වසර	2008–වර්තමානය
කලත්‍රයා(යන්)	අනුරාග් කාශ්‍යප් (වි. 2011; දික්කසාදය 2015)
සහකරුවා(වන්)	ගයි හර්ෂ්බර්ග්
දරුවන්	1
ඥාතීන්	බලන්න කේක්ලන් පවුල

ඉන්දියාවේ පොණ්ඩිචෙරියෙහි දී ප්‍රංශ මාපියන්ට දාව උපන් කේක්ලන්, කුඩා කල සිටම රංගනයට යොමුවූවා ය. ලන්ඩන් විශ්වවිද්‍යාලයේ ගොල්ල්ඩ්ස්මිත්ස් වෙතින් නාට්‍යකරණය හැදෑරූවා ය. ඉන්දියාවට නැවත පැමිණීමෙන් පසුව, ඇය සිය ප්‍රථම සිනමා නිර්මාණයට දායක වූයේ චන්දා ලෙසින් 2009 දේව්.ඩී චිත්‍රපටය හරහා ය. එහි රංගනය වෙනුවෙන් ඇයට හොඳම සහාය නිළිය සඳහා ෆිල්ම්ෆෙයාර් සම්මානය හිමි විය. අනතුරුව ඇය, සින්දගී නා මිලේගී දෝබරා (2011) සහ යේ ජවානී හේ දීවානී (2013) නම් වූ සාර්ථක ප්‍රහසන චිත්‍රපට ද්විත්වයට දායක වූ අතර, ඒ අවස්ථා දෙකෙහි දී ම ඇය හොඳම සහාය නිළිය සඳහා වූ ෆිල්ම්ෆෙයාර් සම්මානය උදෙසා නිර්දේශ විය. කේක්ලන් තිර රචන ක්ෂේත්‍රය වෙත පිවිසියේ 2011 අපරාධ සංත්‍රාස චිත්‍රපටයක් වූ දැට් ගර්ල් ඉන් යෙලෝ බූට්ස් හරහා ය. එහි ප්‍රධාන චරිතය ද නිරූපණය කළේ ඇය විසිනි.

ඒක් ථී දායන් (2013) නම් අධිස්වාභාවික සංත්‍රාස චිත්‍රපටය සහ ගලී බෝයි (2019) වැනි වානිජමය චිත්‍රපටවලට තවදුරටත් සිය දායකත්වය ලබාදුන්නා ය. එසේම වේටිං (2015) සහ රිබන් (2017) වැනි ස්වාධීන චිත්‍රපටවල ඇය පෙන්වූ රංගන ප්‍රතිභාව වර්ණනාවට පාත්‍ර විය. මාර්ගරිටා විත් අ ස්ට්‍රෝ (2014) නම් යොවුන් චිත්‍රපටය තුළ මස්තිෂ්ක අංශභාගයෙන් පෙළෙන යුවතියකගේ චරිතය නිරූපණය වෙනුවෙන් ඇයට ජාතික චිත්‍රපට සම්මානයක් ද හිමි විය.