Tórshavn

Tórshavn, up Däänsch Thorshavn, is de Hööftstadt vun de Inselgrupp vun de Färöer. De Stadt liggt up dat Eiland Streymoy. Leven doot dor (Stand: 2005) bi 19.800 Inwahners. De Naam bedutt „Thor sien Haben“. Thor is de Gott vun Dunner un Blitz in de Noordsche Mythologie.

Dat Parlament vun de Färöer mit Naam Løgting liggt in den olen Stadtdeel Tinganes. Ok dat natschonale Kunstmuseum vun de Färöer (Listasavn Føroya) un dat Histoorsche Museum vun de Inselgrupp sünd in Tórshavn tohuse.

De Stadt is in dat 10. Johrhunnert grünnt wurrn. Dat Thing vun de Eilannen is vun de Tied af an in Tórshavn up Tinganes tohopenkamen, mit en korte Unnerbreken vun 1816 bit 1852. In den Tweeten Weltkrieg weer de Stadt, just so as de ganzen Eilannen, besett vun dat Vereenigte Königriek. In de Stadt liggt ok dat Footballstadion vun de Football-Natschonalmannschop vun de Färöer. Dat heet Tórsvøllur.