Kiefer Sutherland
Kiefer Sutherland (vullstännig: Kiefer William Frederick Dempsey George Rufus Sutherland; *21. Dezember 1966 in London, England) is en kanaadschen Schauspeler.
Leven un Wark ännern
Sutherland is de Söhn vun Donald Sutherland un Shirley Douglas, un vun sieten vun de Mudder her bito Enkelsöhn vun Tommy Douglas, de fröher Premierminister uvn de kanaadschen Provinz Saskatchewan weer. Sien nich wennten Vörnaam kummt vun den Speelbaas Warren Kiefer, de 1964 sien Vadder sien eerste Filmrull geven hett.[1][2]
Sien Filmloopbahn güng 1983 los mit den Film Max Dugan Returns, in den he tosamen mit sien Vadder to sehn weer. En Johr later harr he sien Dörbrook mit den Film The Bad Boy, för den he en Nomineeren för den Genie Award kregen hett, watt dat kanaadsche Gegenstück to’n Oscar is.
Dorna speel he in tallrieke Filmen mit. To sien Fröhwark höört to’n Bispeel de Filmen Stand By Me oder The Lost Boys. In’t Johr 1990 is he denn richtig bekannt worrn mit den Psycho-Thriller Flatliners. In disse Tiet harr he ok wat mit de Schauspelersche Julia Roberts, man kort vör de plaanten Hochtiet in’n Sommer 1991 sünd de beiden wedder utenanner gahn.
Mitt vun de 1990er Johren güng dat mit de Loopbahn bargdaal un go’e Rullenanbotten bleven ut, vun wegen dat he sünners op dat Fack vun den Bösen fastleggt weer. He speel dorna in eenige Filmen mit, de nich den groten Spood harrn, beleev denn aver en Comeback, as he de Rull vun Jack Bauer in de Echttietreef 24 övernehmen künn. Vör sien Schauspeel hett he in de Folgtiet mehrere Priesen kregen. För sien Hööftrull in de Feernsehreeg 24 kreeg Sutherland alleen för de Staffeln 6 bit 8 ruchweg 40 Millionen US-Dollar. Dormit is he de Feernsehdorsteller mit de höchsten Gaasch weltwiet.
Sutherland hett en Tweeschensüster, de Rachel heet. He weer bit hüüt tweemol verheiraat un hett en Dochter.
Filmografie (Utwahl) ännern
Utteken ännern
Kiefer Sutherland is bit hüüt (Stand Oktober 2010) för meist föfftig Film- un Feernsehpriesen vörslahn wesen. Wunnen hett he dorvun twölv Utteken, dorünner:
- 1989: de Bronze Wrangler in de Kategorie Theatraalsch Speelfilm för Young Guns
- 2000: de Pries för’n besten Speelfilm vun’t Slamdunk Film Festival för Woman Wanted
- 2002: de Golden Satellite Award in de Kategorie Best Schauspeler in en Dramareeg för 24
- 2002: de Golden Globe in de Kategorie Best Serienhööftdorsteller – Drama för 24
- 2003: de Golden Satellite Award in de Kategorie Best Schauspeler in en Dramareeg för 24
- 2006: de Golden Nymph in de Kategorie Rutragen Hööftdorsteller in en Dramareeg för 24
- 2006: de Emmy in de Kategorie Rutragen Hööftdorsteller in en Dramareeg för 24
- 2008: sien Steern op’n Walk of Fame