بریکینگ بد

اتا شیمی ِمعلم که ونه نوم «والتر وایت» هسته، اصلی نقش ره کا کانده. والتر وایت روزمرگی دله غرق بیّه و هر روز مدرسه شونه و وچون ره درس دِنه. وه خسته هسته که زندگی دله شه آرزوها جه نرسی‌یه و شه عُمر ره تلف هاکرده. داستان پیش شونه تا این که والتر سرساب وانه که سرطان بَئیته؛ ولی انده پول ندارنه که شه ره دوا-درمون هاکنه. والتر شه اتا قدیمی شاگرد ره وینده که متا آمفتامین، که اتی مخدر هسته، ره پجنه و قاچاقی روشنه. این ریکا نوم «جسی پینکمن» هسته و وه هم اتی بباخته‌آدم هسته. والتر و جسی پیمون وندنّه که دست-به-دست هادن و متا آمفتامین بپجن و هم‌باز بوون. والتر شه شیمیدونی جه استفاده کانده و مواد پجنه و جسی شه آشنائون جه روشنه. وشون دِتا اوائل خله دعوا کانّه و اتا بُسّه ماشین جه شونّه بیابون وسط اِستنّه و اونجه شه مواد ره پجنّه. این موادی که والتر ساجنه، خله کیفیت دارنه و ونه واری آمفتامین دیگه بازار دله پیدا نوونه؛ همینسه سریع وشون مشتری زیاد وانه و هرچی ویشته پجنّه، ویشته حریص وانّه که ویشته پول دربیارن. این میون مجبور وانّه کارهای دیگر هم هاکنن و حتا آدم کاشنّه. از قضا والترِ باجا، «هنک شریدر»، پولیس هسته و وشون ِپرونده کفنه ونه دَسِ بِن. والتر رقیب هم پیدا کانده و قاچاقچیونی که بازار دله دَیینه جه درگیر وانه. ونه کار-کاسبی خار پیش شونه و اتا وکیل، «سائول گودمن»، ره استخدام کانّه که وشون وسّه پولشویی هاکنه. تا این که والترِ زنا، «اسکایلر وایت»، قضیه ره سرساب وانه و انده شه مردی ره گیر دِنه و ونه کار دله دخالت کانده که ونه اعصاب خراب وانه...

ایران دله اول این سریال بصورت زیرزمینی با فارسی زیرنویس دست به دست بیّه و بعد خانگی شبکهٔ درون بصورت قانونی دوبله و پخش بیّه. پایین این سریالِ بازیگرون و نقشون و دوبلورون نوم بموئه.