လောရန့်စ်ဝေါင်

မလေးရှားနိုင်ငံ မှ စင်ကာပူ ခွဲထွက်လာပြီး ၇နှစ်အကြာ ၁၉၇၂ ခုနှစ် ဒီဇင်ဘာလ ၁၈ရက်နေ့ တွင် လောရန့်စ်ဝေါင် ကို စင်ကာပူနိုင်ငံ အရှေ့ပိုင်း၌ မွေးဖွားသည်။ဖခင်ဖြစ်သူမှာ အရောင်းဝန်ထမ်းအလုပ်ကို လုပ်ကိုင်ပြီး၊မိခင်ဖြစ်သူမှာ ကျောင်းဆရာမတစ်ဦး ဖြစ်သည်။သူ၏ ငယ်စဉ်ဘဝ ကို စင်ကာပူနိုင်ငံ၏ ပြည်သူ့အိမ်ရာ တိုက်ခန်းတစ်ခုတွင် နေထိုင်ရင်း ရိုးရှင်းစွာ ဖြတ်သန်းခဲ့သည်။ သူသည် ဖခင်ဖြစ်သူ လက်ဆောင်အဖြစ်ပေးအပ်ခဲ့သည့် ဂီတာ အား မြတ်နိုးခုံမင်သည်။ လောရန့်စ်ဝေါင် သည် အမေရိကန်နိုင်ငံ University of Wisconsin-Madison မှ ၁၉၉၄ ခုနှစ်တွင် ဘောဂဗေဒအဓိကဖြင့် သိပ္ပံဘွဲ့၊ ၁၉၉၅ ခုနှစ်တွင် မစ်ရှီဂန်တက္ကသိုလ်မှ အသုံးချစီးပွားရေးဆိုင်ရာ မဟာဝိဇ္ဇာဘွဲ့နှင့် ၂၀၀၄ ခုနှစ်တွင် ဟားဗတ်တက္ကသိုလ်မှ ပြည်သူ့အုပ်ချုပ်ရေးမဟာဘွဲ့တို့အား ရရှိခဲ့သည်။^[၃]

သူ၏ အသက် ၂၅နှစ်အရွယ် ၁၉၉၇ ခုနှစ် ဩဂုတ်လတွင် စင်ကာပူနိုင်ငံ ကုန်သွယ်မှုနှင့် စက်မှုဝန်ကြီးဌာန တွင် ဘောဂဗေဒပညာရှင်အဖြစ် စတင်တာဝန်ထမ်းဆောင်ခဲ့ခြင်းဖြင့် ဝန်ထမ်းဘဝ ကို စတင်ခဲ့သည်။^[၄]ထိုစဉ်အချိန်ကာလသည် အာရှဘဏ္ဍာရေးအကျပ်အတည်း၏အစဖြစ်ပြီး ၎င်း၏ပထမဆုံးတာဝန်မှာ ဒေသတွင်းစီးပွားရေးနှင့် စင်ကာပူအပေါ် သက်ရောက်မှုများဆိုင်ရာ အစီရင်ခံစာအား ပြင်ဆင်ခြင်းတွင် ပါဝင်ခဲ့ရခြင်းဖြစ်သည်။သူသည် ၂၀၀၂ ခုနှစ် ဇန်နဝါရီလတွင် ဘဏ္ဍာရေးဝန်ကြီးဌာန တွင် အရာရှိအဆင့် တာဝန်ပေးခံရသည်။ ထို့နောက် ၂၀၀၄ ခုနှစ် ဇူလိုင်လတွင် ကျန်းမာရေးဝန်ကြီးဌာန တွင် ကျန်းမာရေးစောင့်ရှောက်မှု ဘဏ္ဍာရေးဒါရိုက်တာအဖြစ် ဆက်လက်တာဝန်ပေးခံရသည်။ ၂၀၀၅ ခုနှစ် မေလမှ ၂၀၀၈ ခုနှစ် ဩဂုတ်လအထိ ဝန်ကြီးချုပ် လီရှန်လုံး ၏ ရုံးခန်းတွင် ကိုယ်ရေးအရာရှိအတွင်းရေးမှူး အဖြစ်လည်းကောင်း၊၂၀၀၈ ခုနှစ် စက်တင်ဘာ တွင် စင်ကာပူစွမ်းအင်ဌာန၏ လက်ထောက်အမှုဆောင်အရာရှိချုပ်တာဝန်၊ ၂၀၀၉ ခုနှစ် ဇန်နဝါရီလ ၁ ရက်နေ့တွင် ယင်းဌာန၏ အမှုဆောင်အရာရှိချုပ်အဖြစ်လည်းကောင်း တာဝန်အသီးသီးပေးခံရပြီး ၂၀၁၁ ခုနှစ် ဧပြီလ ၁ရက်နေ့တွင် ယင်းရာထူးမှ နုတ်ထွက်ခဲ့သည်။

လူလတ်တန်းစားမိသားစုမှ ဆင်းသက်လာသူ လောရန့်စ်ဝေါင် သည် ဝန်ကြီးချုပ်လီရှန်လုံး ၏ရုံးခန်းတွင် အဆင့်မြင့်ကိုယ်ရေးအရာရှိအတွင်းရေးမှူးတစ်ဦးအဖြစ် တာဝန်ထမ်းဆောင်ပြီးနောက် ၃နှစ်အကြာ ၂၀၁၁ခုနှစ်တွင် နိုင်ငံရေးလောကသို့ ဝင်ရောက်ခဲ့သည်။ ၂၀၁၁ ခုနှစ်တွင် ပါလီမန်အဖွဲ့ဝင်အဖြစ် ရွေးချယ်ခံခဲ့ရသည်။ဝန်ကြီးဌာနများတွင် တာဝန်များ အဆင့်ဆင့်ပေးခံရပြီးနောက် ၂၀၂၂ ခုနှစ်တွင် ဝန်ကြီးချုပ် လီရှန်လုံး က ၎င်းအား ဒုတိယဝန်ကြီးချုပ်အဖြစ် ခန့်အပ်ခဲ့သည်။သူသည် နှစ်ရှည်အာဏာရ ပြည်သူ့လှုပ်ရှားမှုပါတီ PAP၏ လွှတ်တော်ကိုယ်စားလှယ်အများစုထောက်ခံမှုကို ရထားသူလည်း ဖြစ်သည်။၂၀၂၄ ခုနှစ် မေလ ၁၅ ရက်နေ့တွင် ဝန်ကြီးချုပ် လီရှန်လုံး ရာထူးမှနုတ်ထွက်သွား၍^[၅] လောရန့်စ်ဝေါင် သည် စင်ကာပူနိုင်ငံ၏ စတုတ္ထမြောက်ဝန်ကြီးချုပ် အဖြစ် ကျမ်းသစ္စာကျိန်ဆိုရင်း ၎င်းဝန်ကြီးချုပ်တာဝန်များအား စတင်ထမ်းဆောင်သည်။^[၆]

သူသည် အသက်၂၈ နှစ်အရွယ် တွင် ပထမအိမ်ထောင်ပြုခဲ့ပြီး ၃နှစ်အကြာတွင် ကွာရှင်းခဲ့သည်။^[၇][၈]လက်ရှိတွင် ဘဏ်လုပ်ငန်းရှင်ဟောင်းတစ်ဦးဖြစ်သူနှင့် အိမ်ထောင်ပြုထားကာ^[၉] သားသမီးမရှိပေ။^[၁၀]

1. ↑ Lawrence Wong sworn in as Singapore’s first new prime minister in 20 years။ Aljazeera (15 May 2024)။ 17 May 2024 တွင် ပြန်စစ်ပြီး။
2. ↑ Opening Remarks by Deputy Prime Minister and Coordinating Minister for Economic Policies Heng Swee Keat at the press conference on the new Cabinet line-up on 13 May 2024.။ Prime Minister's Office Singapore (13 May 2024)။ 17 May 2024 တွင် ပြန်စစ်ပြီး။
3. ↑ စင်္ကာပူဝန်ကြီးချုပ် တာဝန်က အနားယူ။ VOA Burmese (၁၅ ဧပြီ၊ ၂၀၂၄)။ ၁၇ မေ ၂၀၂၄ တွင် ပြန်စစ်ပြီး။
4. ↑ စတုတ္ထမြောက် စင်ကာပူ ဝန်ကြီးချုပ်ဖြစ်လာမည့် လောရင့်ဝေါင်း မည်သူနည်း။ The Irrawaddy (၃၀ ဧပြီ ၂၀၂၄)။ ၁၇ မေ ၂၀၂၄ တွင် ပြန်စစ်ပြီး။
5. ↑ စင်္ကာပူဝန်ကြီးချုပ် လီရှန်လွန်း ရာထူးကနားပြီး လီခေတ်အဆုံးသတ်ပြီ။ BBC Burmese (၁၅ မေ ၂၀၂၄)။ ၁၇ မေ ၂၀၂၄ တွင် ပြန်စစ်ပြီး။
6. ↑ လီရှန်လွန်း နေရာမှာ အစားထိုးတာဝန်ယူမယ့် စင်ကာပူဝန်ကြီးချုပ်သစ် ကျမ်းသစ္စာကျိန်ဆို။ NHK Japan (၁၆ မေ ၂၀၂၄)။ ၁၇ မေ ၂၀၂၄ တွင် ပြန်စစ်ပြီး။
7. ↑ You tick my box: How Singapore politicians found love (25 June 2020)။ 4 October 2021 တွင် မူရင်းအား မော်ကွန်းတင်ပြီး။ 4 October 2021 တွင် ပြန်စစ်ပြီး။
8. ↑ "Lawrence Wong on politics, policies, and living alone" (in en)၊ The New Paper၊ 1 September 2015။ 
9. ↑ "DPM Lawrence Wong and his wife, and another new TikTok account: What politicians are up to this week | The Straits Times" (in en)၊ The Straits Times၊ 6 August 2022။ 
10. ↑ Goh၊ Yan Han။ "7 things to know about Singapore's next prime minister Lawrence Wong" (in en)၊ The Straits Times၊ 15 April 2024။