హార్డువేర్

హార్డ్‌వేర్ (Hardware) అనే ఆంగ్ల పదాన్ని సాధారణంగా సాంకేతిక పరికరాలలో భాగాలను సూచించడానికి వాడుతారు. అయితే కంప్యూటర్ వినియోగం, సంబంధిత పదజాలం సాధారణమైనందున ప్రస్తుత కాలంలో ఈ పదం కంప్యూటర్‌లోని భఌతిక పరికర భాగాలను సూచించడానికి అధికంగా వాడుతున్నారు. కంప్యూటర్ల రంగంలో సాఫ్ట్‌వేర్ కాని దానిని, అంటే భౌతికమైన పరికరాలను, వాటికి సంబంధించిన పరిజ్ఞానాన్ని కూడా "హార్డ్‌వేర్" అనే అర్ధంలో ప్రస్తావిస్తున్నారు. నిజానికి దీనిని కంప్యూటర్ హార్డ్‌వేర్ అనడం సమంజసం.

చారిత్రికంగా చెక్క సామానులను చేయడానికి, మరింత బలపరచడానికి వాడే మేకులు, కడ్డీలు, గొళ్ళాలు, తాళాలు, గొలుసులు, వాటిపై పనిచేసే కార్మికులు - ముఖ్యంగా వడ్రంగులు వాడే పరికరాలు వంటి లోహ సామగ్రిని హార్డ్‌వేర్ అనేవారు. "హార్డ్‌వేర్ షాపు"లు గా బజారులో ఉండే దుకాణాలలో లభించేవి ఈ వస్తువులే. ఇంకా పెద్ద పెద్ద మిలిటరీ సామగ్రి (విమానాలు, ఫిరంగులు, ఓడలు, ట్యాంకులు) వంటివాటిని కూడా "మిలిటరీ హార్డ్‌వేర్" అని ప్రస్తావిస్తుంటారు.