Lipoproteína

Unha lipoproteína é un complexo formado por elementos proteicos e lipídicos, que se manteñen unidos por enlaces non covalentes, que se encontra no sangue. Cada unha das lipoproteínas posúe unha masa molecular, estrutura e densidade características. Á porción proteica da lipoproteína denomínase apolipoproteína. A súa misión é transportar os lípidos insolubles polo sangue.

En xaxún hai catro lipoproteínas, denominadas en función da súa densidade:

• Lipoproteína de alta densidade (High density lipoprotein ou HDL)
• Lipoproteína de baixa densidade (Low density lipoprotein ou LDL). Nalgúns casos é denominada LDL 1
• Lipoproteína de densidade intermedia (Intermediate lipoprotein ou IDL). Nalgúns casos é denominada LDL 2
• Lipoproteína de moi baixa densidade (Very low density lipoprotein ou VLDL).

Tras a comida, áchase outra, o quilomicron, que transporta os triglicéridos dende o intestino delgado ata o sangue venoso por medio do conduto torácico.

Ademais destas, moitos encimas, transportadores, proteínas estruturais, antíxenos, adhesinas e toxinas son lipoproteínas.

Lipoproteínas transmembrana editar

Algúns proteolípidos transmembrana, especialmente os que se encontran en bacterias, denomínanse lipoproteínas, pero non están relacionadas coas partículas lipoproteicas do plasma antes mencionadas.^[1] Estas proteínas transmembrana son difíciles de illar, xa que están estreitamente unidas á membrana lipídica, e adoitan necesitar lípidos para mostrar a súa verdadeira estrutrua e poden ser insolubles en auga. Xeralmente son necesarios deterxentes para illalas das membranas ás que está asociadas.