Fernando Poe Jr.

Si Ronald Allan K. Poe aki kan saro man na Filipinong aktor na si Allan Fernando Poe y Reyes (Fernando Poe, Sr.) asin si Elizabeth "Bessie" Kelley, sarong Amerikano. Siya namundag sa Manila. An saiyang mga magurang bako pang kasal kan siya inaki kan 1939, pero totoo nagpakasal sinda kan 1940. Mala ngane ta an bagay na ini iyo an pada'tolan kan mga kalaban niya sa pulitika kan pighingoa nindang madiskaril an kandidatura ni Poe, Jr. kan 2004 ta sinasabi nindang si Poe, Jr. ilehitimong aki kan sarong ina na bako man Filipino. Siya an ikaduwang aki sa anom na magturugang asin ta an tunay na pinangaranan na Fernando Poe, Jr. iyo an saiyang tugang na Andy (Fernando II) pero ginamit niya ining pangaran sa pelikula ta bantogan man an ama niya sa puting kurtina. Si Conrad Poe, saro man aktor iyo an saiyang tugang sa ama sa sarong babaeng nakarelasyon kani, si Patricia Mijares.Sinasabing an Poe nasusurat talagang Pou na iyo an orihinal na apelyido kan saiyang lolohon, an dramatistang si Lorenzo Pou, sarong Catalan na migrante gikan Majorca, Espanya na naglaog sa palakayang pagmimina igdi sa Filipinas.

Kan 1953 si Poe nagtapos kan primariya niya sa San Beda College. Sa haiskul, nag'entra siya sa San Sebastian College. Nagpadagos siyang mag'adal sa Mapua Institute of Technology asin University of the East. An saiyang ama nagadan huli sa rabies kan nag'eedad na 35 kaya siya an nagin solong nagsusustento sa pamilya kaya napiritan magpondo pagklase.

Si Poe inagom si Susan Roces, sarong aktres (tunay na pangaran: Jesusa Sonora) sa sarong kasal na sibil kan Desyembre 1968 alagad nagpakasal man sa simbahan asin ta an saindang mayor na mga padrino/madrina iyo sa Presidente Ferdinand Marcos asin si Enot na Gining Imelda. Si Poe asin Roces nag'ampon nin aking babae, si dating MTRCB Chairman asin nagin senador ngonyan kandidato para presidente na si Grace Poe. Dawa totoo habo magpara'osipon si Poe kan pribado niyang buhay, inako niya man giraray na siya may duwang aki sa duwang magka'ibang babae, si Ronian aki niya ki Anna Marin asin si Lovi, aki niya ki Rowena Moran.^[1][4]

Si Poe dinara sa St. Luke's Medical Center sa Quezon City kan bangging Desyembre 11, 2004 pakatapos kan tiripon kan grupo duman sa saiyang studio durante sa sarong Christmas party ta nakamate siyang pagkaliyo.^[5] Siya na-stroke asin naghuros sa coma ta igwa palan nagbilog na dugo sa saiyang hutok. An mga doktor nagsarabi na dinapoan siya kan inapod na cerebral thrombosis na kasabay an pagbagsak kan magkapira pang saiyang organo.^[6] Nagadan siyang dai nanagkamalay sa edad na 65 kan Desyembre 14 oras 12:01 am.^[6]

An mga nag'atom sa 9-na-aldaw na bilar nagsasarabi na duwang milyon an nagtaong-galang sa nakahotad.^[7] Su prosesyon sa pagdapit rinibo-ribong nakidumamay napiot nagkono-kono na ngane sa mga kalye kan Quezon City, saro daang pangyayari napagiromdom kan si ginatos na ribong nakilubong ki Ninoy Aquino kan 1983 asin matinee idol na si Julie Vegakain 1985. Ilinubong siya sa nitso kan saiyang pamilya kun saen yaon man duman an mga magurang niya, sa Manila North Cemetery.

Kan Desyembre 14, 2012,walong taon pagkagadan niya, sarong monumento an itinindog para saiya sa kanto kan Roxas Boulevard asin Arquiza Street, na yaon an balo niyang si Susan Roces asin aki si Grace Poe nag'atender sa pagbiklad kan manto kan rebulto.