Paries-Roubaix

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Paries-Roubaix (Frans: Paris-Roubaix) is 'n eindaogse fietsrenkoers die begin aprèl gehawwe weurt. Me fiets euver e parcours vaan zoeget 250 kilometer door Noord-Fraankriek. De start waor vreuger in Paries meh is sinds 1977 ummer in Compiegne; de finish is sinds jaor en daag ummer in 't velodroom vaan Roubaix.

De koers is veural bekind gewore door de väöl stökker straotweeg mèt groof plavejje. Zeker bij slech weer kinne die gevierlek zien en mote de coureurs good hun bès doen veur neet te valle. Bij droeg weer kin me las kriege vaan opwejjende stöb. In de beginjaore waore zoe'n geplavejde weeg normaal; wie ze nao d'n Oorlog evels ummer zeldzaomer woorte, besloot me ze speciaol veur Paries-Roubaix te laote ligke. Door de groete probleme veur de rènners, en de groete kans op slech weer bij de koers, weurt Paries-Roubaix dèks de 'Hèl vaan 't Noorde' (l'Enfer du Nord) of kort-eweg 'de Hèl' geneump.

In 1896 al woort de ierste editie gefiets. Mèt alle oonderbrekinge door d'n Iersten en Twiede Wereldoorlog en de COVID-19-pandemie mètgetèld zien v'r in 2023 touw aon de 120e editie. Opvallend is 't disproportioneel aontal Belzje winners. 'ne Pendant veur vrouwlui gief 't sinds 2021.