Carl Alvar Wirtanen
De Carl Alvar Wirtanen, gebuer den 11. November 1910 zu Kenosha, (Wisconsin, USA), a gestuerwen de 7. Mäerz 1990 zu Santa Cruz (Kalifornien)), war en US-amerikaneschen Astronom.
| Carl Alvar Wirtanen | |
|---|---|
| Gebuer | 11. November 1910 Kenosha |
| Gestuerwen | 7. Mäerz 1990 Santa Cruz |
| Nationalitéit | USA |
| Educatioun | Universitéit vu Virginia |
| Aktivitéit | Astronom |
 | |
De Wirtanen hat Astronomie, Physik a Mathematik op der University of Virginia studéiert. 1939 krut hien do de Master-Titel an huet weider am McCormick-Observatoire vun der University of Virginia geschafft. Vun 1941 bis 1978 war hien am Lick-Observatoire vun der University of California um Mt. Hamilton (Kalifornien) ugestallt, mat enger Ënnerbriechung am Zweete Weltkrich, wärend där hie Fuerschungen an der Ballistik gemaach huet. De Wirtanen war am Lick-Observatoire Observateur a Fuerschungsassistent an huet en etlech grouss Observatiounsprogrammer matgemaach.
De Wirtanen hat och fënnef Koméiten entdeckt, vun deenen dee bekanntsten de periodesche Koméit 46P/Wirtanen dierft sinn, an aacht Asteroiden. Zesumme mam Charles Donald Shane, deemools Direkter vum Lick-Observatoire, huet hien eng Zielung vun ongeféier 1 Millioun Galaxië vum nërdleche Stärenhimmel (Shane-Wirtanen-Galaxienzielung) opgestallt. Op 1246 fotografesche Placken, déi ufanks fir de Studium vun der Eegebeweegung vu Stäre gemaach goufen, hu si mat einfachste Mëttelen d'Galaxien an 1,6 Millioune Felder vu jee 10×10 Bouminutten agedeelt a krute sou eng Virstellung vun der groussraimeger Verdeelung vu Galaxien am Universum.
Kuckt och änneren
Um Spaweck änneren
- Publikatioun vum C.A. Wirtanen am Astrophysics Data System
- (en) A.R. Klemola: Carl Alvar Wirtanen, 1910-1990. Bulletin of the American Astronomical Society; vol. 23 (1991), no. 4, p. 1495-1496. (Noruff)