Timbroù Inizi Cayman

Emañ an Inizi Cayman (Cayman Islands e saozneg) er Mor Karib e su da Guba. Tiriad dindan dalc'h ar Rouantelezh-Unanet eo abaoe 1670, bet meret gant melestradurezh Jamaika betek 1962 pa tapo statud un tiriad tramor.

Un timbr eus 1970 o taolenniñ ardamezioù Inizi Cayman.

N'eus ket bet eus ur velestradurezh postel emren war an enezeg a-raok miz Ebrel 1889, ha timbroù Jamaika a veze graet gante betek ar c'houlz-se. Anavezet e oa daou gached-post disheñvel : GRAND CAYMAN e Georgetown ha CAYMAN BRAC e Stake Bay.

An timbroù kentañ gant an alc'hwez Cayman Islands a voe embannet e miz Du 1900, tra ne oa mui degemeret evit kas lizhiri re Jamaika en tu all d'an 19 a viz C'hwevrer 1901. Hep an disterañ souezhadenn eo poltred ar Rouanez Victoria ha hini ar Roueed a reno war he lerc'h a ra danvez an timbroù boutin kentañ : Edouarzh VII etre 1902 ha 1908, George V etre 1912 ha 1926.

E 1932 avat e teu er-maez un timbr evit lidañ 100 vloaz ar vodadenn lezennadurel (Legislative Assembly) ha diwezhatoc'h (1935) ar rummad “touristel” kentañ a ro da anavezout gwelloc'h ar vro hag an natur (ur wezenn-gokoz, morskouled, baoted war un draezhenn …). Pemp tresadenn zisheñvel a ra d'ober ar rummad 12 timbr. War bep hini e weler penn ar Roue George V en un hirgelc'h, hag e vab George VI er rummad embannet e 1937 war an hevelep patrom.

Goude ar brezel e kaver ur skouerenn eus ar rummad bet savet evit an holl drevadennoù en impalaeriezh saoz : Deiz-ha-bloaz an Trec'h (1946), eured arc'hant ar pennoù kurunet (1948) ha 75vet deiz-ha-bloaz Unvaniezh Postoù ar Bed.

E 1950 ec'h arvester ur rummad damheñvel nemet gant poltred ur Roue koshoc'h. Buan e tilezo e blas da Elesbed II. Ar Vonreizh nevez a zo abeg un timbr ispisial e 1959.

Kalzig timbroù a vo embannet er bloavezhioù 1990, un tamm mat anezho gouestlet da familh ar Rouanez, da loened ar vro, da ouelioù Nedeleg…

Levrlennadur kemmañ

(en) Aguilar, E. F. and P. T. Saunders. The Cayman Islands: Their Postal History, Postage Stamps and Postmarks. Folkestone: F. L. Parson, 1962 111p.
(en) Burges, Ivan. The History of the Cayman Island Post Offices. Grand Cayman: I. Burges, 2006 63p.
(en) Giraldi, Thomas E. and Peter P. McCann. The Postal History of the Cayman Islands. Weston, MA.: Triad Publications, 1989 172p.
(en) Maisel, Richard. Cayman Islands. Alicante: British West Indies Study Circle, 2006 (ISBN 0-953880-44-3) 42p.
(en) Melville, Fred J. Cayman Islands. London: Melville Stamp Books, 1912 68p.
(en) Oliver, Ed. The Post Cards of the Cayman Islands including Cayman Brac and drawings of Little Cayman. Cayman Islands: EDO Ltd., 1993.
Proud, Edward B. The Postal History of the Cayman Islands and Turks & Caicos Islands. Heathfield, East Sussex: Proud Publications, 2006 (ISBN 978-1-87246-538-8) 152p.