Černuobīlis
Černuobīlis (okrainėitėškā Чорнобиль, rosėškā: Чернобыль) — miests šiaurės Okraėnuo, Kėjeva srėtī, 90 km ī šiaurē nū Kijeva, 15 km nū robežė so Baltarosėjė. Černuobīlis bova svarbus rīšiu, prekības ė uomėrcėjės cėntrs, īpatėngā XIX o. Ož 14,5 km nū miesta bova pastatīta Černuobīlė atuomėnė alektrėnė. Miests ėšgarsieja, kumet diel operatoriu klaiduos ė trūkomu RBMK tėpa reaktuoriaus konstrukcėjuo 1986 m. balondė 26 d. 01:23 vėitėniu čiesu īvīko dėdliausė svietė atuomėnės jiegainės avarėjė, toriejosi gluobalaus masta pasiekmiū. Spruogus reaktorioj ė kėlus gaisruou ī aplinka patek radioaktīvūs materijalā. Oficēlē žova 56 žmuonės, avarėjės čiesu ėš miesta ė apīlinkiu bova evakouta aple 130 tūkst. gīventuoju (skaitont Pripetės ė Opačičiu miestus). Tik apīlinkies gīvenama vėresnio omžiaus žmoniū, katrie nevierėjė radiacėjė a nenuorėjė palėktė gėmtuosės žemės. Daba reaktuorios īr ožbetonouts sarkuofagė, no Černuobīlė zuona ėšleikta vėina ėš patiū radioaktėviausiu veitu visuo Žemie. Apsauguos zuona irinki Černuobīliaus īr 30 km spėnduoliu.
![](http://upload.wikimedia.org/wikipedia/commons/thumb/8/8b/Tchernobyl_radiation_1996.svg/200px-Tchernobyl_radiation_1996.svg.png)
Ėvairēs skaitlevėmās diel prižastiu sosėjusiu so katastruofa žova 10 tūkst. žmuoniu, dā 3,5 mėlėjuona sosėrga. Diel radiacėjės, skīdliaukės vėžīs padažnieje dešėmts sīkiu. Černobīlio elektrėnė alėktra gamėna da 14 metu — ėkė 2000 m.