Հունան

Հունան, նահանգ Չինաստանում, Յանցզի գետի միջին հոսանքների և Դունտինհու լճի ավազանում։ Տարածությունը 210 հզ. կմ² է, բնակչությունը՝ 37,18 մլն (1973), վարչական կենտրոնը՝ Չանշա։ Նահանգի արևմուտքում և հարավում տիրապետում են լեռներն ու բլուրները, կենտրոնական մասում և հյուսիսում՝ հարթավայրերը։ Կլիման մերձարևադարձային է, մուսսոնային։ Տնտեսության հիմքը գյուղատնտեսությունն է։ Մշակվում է նահանգի տարածքի 1/5%-ը։ Մշակում են բրինձ, եգիպտացորեն, ցորեն, գարի, ճենականեփ, բամբակ, թեյ, կանճրակ, գետնընկույզ, ջուտ, ծխախոտ։ Զբաղվում են նաև այգեգործությամբ, ձկնորսությամբ, ձկնաբուծությամբ, անասնապահությամբ, փայտանյութի մթերմամբ և տունգի յուղի ստացմամբ։ Զարգանում է լեռնահանքային արդյունաբերությունը, գունավոր մետալուրգիան, մեքենաշինությունը։ Արդյունահանվում է ծարիր, կապար, ցինկ, վոլֆրամ, մանգան։ Կան սննդի, թղթի և տեքստիլ արդյունաբերության ձեռնարկություններ, արհեստագործություն։

Վարչական բաժանում

Հունանը բաժանված է օկրուգային 13 վարչական և 1 ինքնավար միավորի, որոնք ուղղակիորեն ենթարկվում են նահանգային իշխանություններին։

Քարտեզ	№	Հայերեն անուն	Չինական անուն	Փինյին	Կարգավիճակ
	1	Չանշա	长沙市	Chángshā shì	Վարչական միավոր
	2	Չանդե	常德市	Chángdé shì	Վարչական միավոր
	3	Չենչժոու	郴州市	Chénzhōu shì	Վարչական միավոր
	4	Հենյան	衡阳市	Héngyáng shì	Վարչական միավոր
	5	Հուայհուա	怀化市	Huáihuà shì	Վարչական միավոր
	6	Լոուդի	娄底市	Lóudǐ shì	Վարչական միավոր
	7	Շաոյան	邵阳市	Shàoyáng shì	Վարչական միավոր
	8	Սյանտան	湘潭市	Xiāngtán shì	Վարչական միավոր
	9	Իյան	益阳市	Yìyáng shì	Վարչական միավոր
	10	Յունչժոու	永州市	Yǒngzhōu shì	Վարչական միավոր
	11	Յուեյան	岳阳市	Yuèyáng shì	Վարչական միավոր
	12	Ճանծիածիե	张家界市	Zhāngjiājiè shì	Վարչական միավոր
	13	Չժուչժոու	株洲市	Zhūzhōu shì	Վարչական միավոր
	14	Սյանսի-Տուցզյա-Մյաոսկի ինքնավար միավոր	湘西土家族苗族自治州	Xiāngxī Tǔjiāzú Miáozú zìzhìzhōu	Ինքնավար միավոր

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 645)։